Польшча падрыхтавала транзітныя калідоры для ўкраінскага збожжа

• 24.09.2023, 16:33

Пра гэта паведаміў прэзідэнт Польшчы.

Прэзідэнт Польшчы Анджэй Дуда заявіў, што ягоная краіна падрыхтавала транзітныя калідоры для экспарту ўкраінскага зерня дзяржавам, якія маюць у гэтым патрэбу. Пра гэта паведамляе PAP і TVP1.

«У Польшчы падрыхтавалі транзітныя калідоры, дзякуючы якім украінскае зерне можа праходзіць праз Польшчу і экспартавацца куды трэба. Мы спрабуем дапамагчы Украіне і тым дзяржавам, якія маюць патрэбу ў гэтай дапамозе», – сказаў ён.

Паводле словаў Дуды, Польшча – самадастатковая ў гэтым плане дзякуючы працы польскіх фермераў і палякам «не патрэбнае ўкраінскае збожжа».

Таму, зазначыў польскі прэзідэнт, эмбарга на ўкраінскую аграпрадукцыю «было правільным».

Паводле ягоных словаў, украінскае збожжа «не дайшло да тых краінаў, якія ў ім мелі патрэбу», а трапіла на такія рынкі, як польскі.