Стала вядома, каго могуць пасяліць у вальеры выстаўленага ў Беларусі на продаж кракадзіла

• 10.08.2024, 13:06

Нечаканы выбар.

Некалькі тыдняў таму беларусам прапаноўвалі набыць жывога кракадзіла. У той момант аўкцыён не адбыўся, але дырэктар менскага заапарка Аляксандр Сафронаў пазней расказаў, каго могуць «падсяліць» у вальер жывёлы, калі яе ўсё ж атрымаецца прадаць. Пра гэта піша БелТА.

«Кракадзіл жыве ў вальеры, які першапачаткова прызначаўся капібарам. Калі драпежнік памяняе сваё месца жыхарства, то мы папоўнім калекцыю капібарамі», – сказаў кіраўнік.

Нагадаем: спачатку кракадзілам з мянушкай Дандзі валодала менская кампанія, але потым яна пайшла ў ліквідацыю і стала распрадаваць уласнасць – на гандаль выставілі і кракадзіла. Для прадстаўнікоў свайго віду жывёла маладая, 2010 года нараджэння. Як удакладняе Onlíner першы намеснік дырэктара ЗАТ «Белрэалізацыя» Юрый Петручэня, набыць кракадзіла на гандлі можа і звычайны чалавек.

На старце за Дандзі прасілі 2000 рублёў, але адзіны зарэгістраваны пакупнік не пацвердзіў угоду. Гандаль будзе праведзены нанава 13 жніўня. Стартавы кошт – 1800 рублёў.