Войскі РФ патрапілі ў «сапраўдны бермудскі трыкутнік» ва Украіне

• 7.02.2025, 10:03

Акупанты ўпарта «лезуць» туды, адкуль не вяртаюцца.

УС РФ знайшлі лакацыю ва Украіне, дзе «страчваюць» назаўжды сваіх вайскоўцаў. Пра гэта 7 лютага паведаміў ваенны карэспандэнт Багдан Мірошнікаў.

«Шахта «Тарэцкая» стала для акупантаў сапраўдным бермудскім трыкутнікам. Ідзе туды шмат ворагаў на штурм нашых пазіцый, а вяртаюцца - адзінкі. І ўсё роўна лезуць! Такая ўпартасць не паддаецца логіцы, не паддаецца разуменню, не паддаецца нічому», - распавёў ён.

У пасёлку Крымскае, са слоў вайсковага карэспандэнта, «усё даволі складана». Тамака «вельмі цяжка» нават вызначыць лінію боесутыкнення, бо яна ўвесь час змяняецца, рухаючыся то ў адзін, то ў іншы бок.

У выніку ў раёне Забалка ў Тарэцку ідуць баі "за кожны дом, за кожны агарод". У пасёлку Шчарбінаўка і вёсцы Леанідаўка працягваюцца манеўровыя баі.

"Дарэчы, вельмі нагадвае тое, што цяпер на Куршчыне", – адзначыў Мірошнікаў.

Ён растлумачыў, што галоўнае - гэта захаванне жыцця і здароўя абаронцаў, таму Сілы абароны пры неабходнасці могуць адысці. Аглядальнік удакладніў, што гэта можа быць патрэбна, каб утылізаваць больш расейскіх акупантаў, а потым вярнуць страчаныя пазіцыі.

«Тарэцкі раён абароны працягвае сцягваць значныя сілы акупанта, якія ён не можа накіраваць на іншыя ўчасткі. У першую чаргу - на Часаў Яр і Канстанцінаўку. Баі за Тарэцк працягваюцца 7 месяцаў, і будуць працягвацца яшчэ, таму што фіналу там пакуль не бачна», - рэзюмуе ён.