Авіяцыя УСУ атакавала базу расейцаў у Курскай вобласці

• 14.04.2025, 17:05

Для ўдару выкарыстоўвалі французскі высокадакладны боепрыпас.

Украінская баявая авіяцыя нанесла прыцэльны ўдар па прамысловым аб'екце ў пасёлку Цяткіна Курскай вобласці РФ. Пра гэта паведамляе «Главред» са спасылкай на тэлеграм-канал «Саняшнік», звязаны з УС Украіны.

Вядома, што мэтай удару стаў мясцовы цукровы завод, дзе, са звестак крыніц, размяшчаліся падраздзяленні расейскіх войскаў і беспілотныя лятальныя апараты, якія вораг выкарыстоўваў у баявых дзеяннях супраць УСУ.

Для нападу ўкраінскія вайскоўцы выкарыстоўвалі высокадакладны авіяцыйны боепрыпас французскай вытворчасці AASM Hammer, адаптаваны да знішчальнікаў МіГ-29 ВПС Украіны.

Апублікаваныя кадры сведчаць, што боепрыпас прабіў дах будынка і ўзарваўся ўнутры, разбурыўшы значную частку прамысловага цэха.

Цікава, што расейскія інфармацыйныя рэсурсы ўжо пацвердзілі факт удару, указаўшы на шматлікія страты сярод вайскоўцаў і параненых.