Мэр Варшавы захоўвае шанцы стаць прэзідэнтам Польшчы

• 16.04.2025, 21:42

Апытанне.

Мэр Варшавы і кандыдат у прэзідэнты Польшчы ад партыі ўлады «Грамадзянская кааліцыя» Рафал Тшаскоўскі захоўвае шанцы перамагчы на выбарах у другім туры.

Пра гэта сведчыць апытанне CBOS, звесткі якога прыводзіць Onet.

Калі б Рафал Тшаскоўскі і Караль Наўроцкі, якога падтрымлівае апазіцыйная партыя «Права і справядлівасць», сустрэліся б у другім туры выбараў, кандыдат ад «Грамадзянскай кааліцыі» атрымаў бы 52% галасоў. Паводле апытання, Наўроцкі атрымаў бы 44% галасоў.

Калі б у другі тур прэзідэнцкіх выбараў выйшлі Тшаскоўскі і кандыдат ад партыі «Канфедэрацыя» Славамір Менцэн, за першага прагаласаваў бы 51% выбарнікаў, а за другога – 47%.

Апытанне праводзілася праз тэлефонныя інтэрв'ю з дапамогай кампутара (CATI – 87,5%) і анлайн-інтэрв'ю (CAWI – 12,5%) у перыяд з 7 да 9 красавіка 2025 года на выбарцы 1000 поўнагадовых жыхароў Польшчы.