Брытанія падтрымае адпраўку Нямеччынай ракет Taurus ва Украіну

• 17.04.2025, 10:28

Пазіцыя Лондана стала сігналам падтрымкі новаабранаму канцлеру Фрыдрыху Мэрцу.

Вялікабрытанія гатовая падтрымаць Нямеччыну ў перадачы Украіне ракет далёкага радыусу дзеяння Taurus. Зрэшты, канчатковая пастанова застаецца за Нямеччынай, дзе дагэтуль працягваюцца дыскусіі з гэтай нагоды. Аб гэтым піша The Telegraph са спасылкай на крыніцы ва ўрадзе.

«Мы працягваем працаваць з нашымі партнёрамі, у тым ліку Нямеччынай, каб узброіць Украіну як мага лепш для абароны яе суверэннай тэрыторыі», - сказаў суразмоўца выдання.

Як пішуць журналісты, такая пазіцыя можа таксама служыць дадатковым сігналам падтрымкі новаабранаму канцлеру Фрыдрыху Мэрцу, які ўступіць на пасаду ў пачатку траўня.

The Telegraph дадае, што Taurus - магутная сістэма крылатых ракет, якая можа знішчаць цэлі ў глыбіні расейскай тэрыторыі, што робіць яе патэнцыйнай зброяй, якая можа змяніць правілы гульні ў руках украінскіх войскаў.