Кітай упершыню адказаў на абвінавачанне Украіны ў пастаўках зброі Расеі

• 18.04.2025, 12:04

Пекін пракаментаваў заяву Зяленскага.

Кітай раскрытыкаваў прэзідэнта Украіны Уладзіміра Зяленскага, які заявіў, што Пекін пастаўляе зброю Расеі. У Кітаі назвалі словы Зяленскага «беспадстаўнымі».

Пра гэта паведамляе Sky News са спасылкай на спікера Міністэрства замежных спраў Кітая Лін Цзяня.

Спікер МЗС Кітая сцвярджае, што Пекін ніколі не даваў смяротнай зброі якому-небудзь баку ва «ўкраінскім крызісе» (так у Кітаі называюць вайну, якую РФ развязала супраць Украіны).

Лін Цзянь назваў заяву прэзідэнта Украіны ў дачыненні да Кітая «беспадстаўнай».

Зяленскі абвінаваціў Кітай у пастаўках зброі РФ

У чацвер, 17 красавіка, на брыфінгу прэзідэнт Украіны Уладзімір Зяленскі заявіў, што з'явілася інфармацыя, якая пацвярджае, што Кітай пастаўляе ўзбраенне Расеі.

«На сёння мы маем інфармацыю ад СБУ і выведкі аб пораху, артылерыі», - сказаў Зяленскі.

Ён таксама дадаў, што ёсць звесткі аб тым, што прадстаўнікі Кітая займаюцца вытворчасцю зброі на тэрыторыі Расеі.