HIMARS супраць «Урагана»: байцы УСУ знішчылі ў двубоі расейскую РСЗА

• 18.04.2025, 12:20

Відэафакт.

Сілы абароны Украіны паспяхова выкарысталі амерыканскую рэактыўную сістэму залпавага агню M142 HIMARS для знішчэння расейскай РСЗА БМ-27 «Ураган». Цэль была выяўленая дзякуючы выведвальнаму беспілотніку брыгады «Чорны лес».

Кадры баявой працы апублікавала прэс-служба Сухаземных войск УСУ.

Расейская 220-мм рэактыўная ўстаноўка стаяла каля дарогі, мела поўны боекамплект і знаходзілася пад назіраннем украінскага дрона, які перадаў каардынаты артылерыстам і карэктаваў агонь.

Для знішчэння цэлі быў ужыты адзін высокадакладны набой GMLRS, выпушчаны з устаноўкі HIMARS. Хоць ракета ўпала на некалькі метраў далей ад самой устаноўкі, абломкі выклікалі ўзгаранне боекамплекта, што прывяло да поўнага знішчэння сістэмы.

Перавагі HIMARS

Вайсковыя эксперты адзначаюць, што амерыканская сістэма HIMARS адрозніваецца ад савецкіх РСЗА «Град» і «Ураган» перш за ўсё дакладнасцю. Тады як расейскія ўстаноўкі выкарыстоўваюць некіраваныя рэактыўныя набоі, якія ствараюць эфект пляцавага паражэння, HIMARS абсталяваныя высокадакладнымі боепрыпасамі з GPS-навядзеннем, такімі як GMLRS (Guided Multiple Launch Rocket System). Гэта дазваляе знішчаць цэлі з мінімальным адхіленнем і без неабходнасці масаванага залпу.

Акрамя таго, HIMARS перасягае ў мабільнасці, хуткасці перазарадкі і далёкасці дзеяння. Такая тэхналагічная дакладнасць дазваляе эфектыўна знішчаць як стацыянарныя, так і рухомыя цэлі, мінімізуе выдаткі боепрыпасаў і час на правядзенне агнявой задачы.