Цяпло пераменлівае: якім будзе надвор'е на велікодныя святы ў Беларусі

• 19.04.2025, 14:38

Сіноптыкі падзяліліся прагнозам.

На Вялікдзень беларусы парадуюцца цёпламу надвор'ю, а з панядзелка ўжо крыху пахаладае.

У суботу, 19 красавіка, надвор'е ў асноўным вызначаецца вобласцю падвышанага атмасфернага ціску ў цёплай паветранай масе, паведамляе Белгідраметэацэнтр.

На захадзе краіны адчуецца ўплыў франтальнага падзелу. Чакаецца пераменная воблачнасць. Пераважна без ападкаў, аднак на захадзе магчымыя кароткачасовыя дажджы, месцамі з навальніцамі. Вецер паўднёвы, сярэдні, раніцай і ўдзень месцамі парывісты. Тэмпература паветра ўначы +8..+14°C, удзень ад +19°C на захадзе да +26°C на ўсходзе краіны. Атмасферны ціск уначы істотна не зменіцца, удзень крыху знізіцца.

На Вялікдзень, 20 красавіка, надвор'е будзе вызначацца франтальнымі сістэмамі з Заходняй Еўропы. Чакаецца воблачнае з прасвятленнямі надвор'е. Уначы месцамі, а раніцай і ўдзень - на большай частцы тэрыторыі пройдуць кароткачасовыя дажджы, у асобных раёнах магчымыя навальніцы. Уначы і раніцай - слабы туман. Вецер паўднёвай чвэрці, сярэдні, месцамі парывісты. Тэмпература паветра ўначы +7..+13°C, удзень +17..+22°C, на поўдні і паўднёвым усходзе – да +25°C.

А вось ужо з панядзелка, 21 красавіка, пачне патроху халадаць: чакаюцца кароткачасовыя дажджы месцамі па краіне, удзень магчымыя навальніцы. Уначы і раніцай - слабы туман. Вецер пераменных кірункаў, сярэдні, пры навальніцах - парывісты. Тэмпература паветра ўначы +7..+13°C, удзень ад +18°C на поўначы да +26°C на поўдні.