Хрысціяне ўсяго свету адзначаюць Вялікдзень

• 20.04.2025, 8:03

Сёлета свята агульнае для ўсіх канфесій.

Каталікі, праваслаўныя і пратэстанты ў Беларусі і па ўсім свеце святкуюць Вялікдзень.

Ва ўсіх каталіцкіх касцёлах, праваслаўных цэрквах і пратэстанцкіх малітоўных дамах Беларусі прайшлі святочныя богаслужэнні.

Вялікдзень – самы чаканы светлы дзень для многіх хрысціянаў. Вялікдзень сімвалізуе Уваскрэсенне з мёртвых Ісуса Хрыста, які прыняў смерць за грахі людзей і дзеля збаўлення чалавечага роду.

Вялікдзень адносіцца да святаў з зменнай датай, бо свята вылічаецца паводле месяцова-сонечнага календара і адзначаецца ў першую нядзелю пасля першай вясновай поўні.

Нягледзячы на розніцу ў календарах, каталікі (грыгарыянскі каляндар) і праваслаўныя (юліянскі каляндар) сёлета адзначаюць Вялікдзень у адзін дзень.