Fox News трансляваў Вялікдзень з Масквы і зрабіў Кіеў «расейскім»

• 20.04.2025, 13:29

Памылка ці правакацыя?

Амерыканскі тэлеканал Fox News паказаў велікоднае набажэнства з Масквы з удзелам Пуціна. Пазней на экране Кіеў пазначылі як частку Расеі.

Пра гэта паведамляе РБК-Украіна са спасылкай на Fox News.

Амерыканскі тэлеканал Fox News на Вялікдзень трансляваў набажэнства з Храма Хрыста Збавіцеля ў Маскве, дзе прысутнічаў расейскі дыктатар Уладзімір Пуцін.

У трансляцыі таксама паказалі Велікоднае набажэнства з Кіева, аднак пасля назвалі яго часткай Расеі.

Цягам некалькіх гадзін Fox News паказваў цырымонію ў Маскве, дзе акрамя Пуціна таксама прысутнічаў мэр горада Сяргей Сабянін.

Кіраўніка РПЦ патрыярха Кірыла далі ў эфір са зваротам да расейцаў.

На экране паралельна ў невялікім акенцы транслявалася набажэнства з Міхайлаўскага Залатаверхага сабора ў Кіеве - цэнтра Праваслаўнай царквы Украіны.

Першапачаткова відэа мела правільны подпіс: «Велікоднае набажэнства: Кіеў, Украіна».

Аднак пасля перапынку ў эфіры Fox News вярнуў трансляцыю з подпісам: «Велікоднае набажэнства: Кіеў, Расея».