У Беларусі ліквідавалі трансмежны пажар

• 20.04.2025, 20:26

Агонь напярэдадні перакінуўся з тэрыторыі Украіны.

У Беларусі ліквідавалі трансгранічны лясны пажар, які напярэдадні перакінуўся з тэрыторыі Украіны на землі Мілошавіцкага лясгаса. Пра гэта паведамляе Міністэрства лясной гаспадаркі.

Паводле інфармацыі ведамства, агнём аказаліся ахопленыя дзясяткі гектараў ляснога фонду. Дакладная плошча пацярпелай тэрыторыі ўдакладняецца.

У тушэнні пажару бралі ўдзел сілы не толькі Мілошавіцкага лясгаса, але і суседніх лесагаспадарчых устаноў: Лельчыцкага, Ельскага, Калінкавіцкага, Мазырскага досведнага лясгаса і Нараўлянскага спецлясгаса. Акрамя таго, да ліквідацыі агню далучыліся ратавальнікі Лельчыцкага раённага аддзела ў надзвычайных сітуацыях.

Усяго на месцы працавала 20 адзінак тэхнікі і 70 чалавек.

У Мінлясгасе падкрэслілі, што дзякуючы зладжанай працы леснікоў і ратавальнікаў распаўсюджванне агню ўдалося аператыўна спыніць.