Прэзідэнт Сальвадора хоча абмяняць крымінальнікаў на палітвязняў

• 21.04.2025, 14:32

Паводле схемы "252 на 252".

Прэзідэнт Сальвадора Наіб Букеле хоча абмяняць венесуэльскіх нелегалаў і злачынцаў, высланых з ЗША, на "палітычных зняволеных", якія ўтрымліваюцца ў турмах Венесуэлы, піша "Коммерсант"».

Сальвадор у пачатку лютага пагадзіўся размяшчаць у сваіх турмах затрыманых у ЗША нелегальных мігрантаў. Акрамя таго, Букеле пагадзіўся за дадатковую плату ўзяць пад варту асуджаных у Штатах злачынцаў. Усіх іх адпраўляюць у Цэнтр зняволення тэрарыстаў, вядомы як “мегатурма”.

Улады Венесуэлы называюць працэс масавай высылкі венесуэльскіх грамадзян з ЗША іх “рэпатрыяцыяй” і падаюць тое, што адбываецца, як дыпламатычны поспех і вынік сяброўскіх перамоў Нікаласа Мадуры з Дональдам Трампам.

Цяпер жа прэзідэнт Сальвадора выступіў у сацсетцы X з прапановай абмяняць "крымінальных" на "палітычных" паводле схемы "252 на 252". Менавіта столькі венесуэльцаў Сальвадор прыняў у сябе ў рамках пагаднення з Вашынгтонам.

“У адрозненне ад нашых зняволеных, многія з якіх учынілі забойствы, іншыя - згвалтаванні, а некаторыя нават былі арыштаваныя некалькі разоў, перш чым іх дэпартавалі, вашыя палітычныя зняволеныя не чынілі ніякіх злачынстваў. Адзіная прычына, праз якую яны знаходзяцца ў зняволенні, - гэта тое, што яны выступалі супраць вас і вашых фальсіфікацый на выбарах”, - напісаў Букеле.

Генеральны пракурор Венесуэлы Тарэк Уільям Сааб у адказ назваў прапанову Букеле “цынічнай” і запатрабаваў спіс імёнаў усіх венесуэльцаў, якія ўтрымліваюцца ў “мегатурме” Сальвадора.