Даляр абрынуўся да мінімуму за тры гады

• 21.04.2025, 19:42

Амерыканская валюта падае на фоне нападак Трампа на адрас кіраўніка ФРС.

Амерыканскі даляр упаў да трохгадовага мінімуму на фоне пагроз прэзідэнта ЗША Дональда Трампа на адрас старшыні ФРС Джэрома Паўэла, паведаміў CNBC. У панядзелак Трамп зноў раскрытыкаваў Паўэла, назваўшы старшыню ФРС «містэрам Занадта Позна» і «буйным няўдачнікам» на сваёй старонцы ў сацыяльнай сетцы Truth Social, паведаміў тэлеканал.

Трамп заклікаў кіраўніка рэгулятара знізіць адсоткавыя стаўкі проста зараз. «Многія заклікаюць да папераджальнага зніжэння ставак», - напісаў Трамп, адзначыўшы, што кошты энэрганосьбітаў і многіх прадуктаў істотна знізіліся. З яго слоў, інфляцыі ў ЗША можа амаль не быць, але можа быць запаволенне эканомікі, калі Паўэл не знізіць стаўкі зараз. Трамп таксама адзначыў, што ЕЦБ ужо знізіў адсоткавыя стаўкі сем разоў.

У панядзелак, 21 красавіка, індэкс даляра DXY, які паказвае кошт амерыканскай валюты да валют шасці іншых краін - асноўных гандлёвых партнёраў ЗША, на мінімуме ўпаў да 97,92 пункта. Гэта самы нізкі ўзровень з сакавіка 2022 года. У кошык валют уваходзяць еўра, японская ена, брытанскі фунт, канадскі даляр, швэдская крона і швэйцарскі франк. Індэкс разлічвае Intercontinental Exchange (ICE).

На 19:03 паводле Менску індэкс DXY зніжаўся на 1% - да 98,37 пункта.