Як калядная ялінка: аналітыкі паказалі маштабы пажару на складзе боепрыпасаў пад Масквой

• 23.04.2025, 9:26

Спадарожнікі NASA фіксуюць гарэнне на ўсёй тэрыторыі арсенала.

Спадарожнікі NASA фіксуюць гарэнне на ўсёй тэрыторыі гарнізона ва Уладзімірскай вобласці Расеі, дзе знаходзіцца адзін з найбуйнейшых арсеналаў ракетна-артылерыйскага кіравання мінабароны РФ. OSINT-аналітыкі апублікавалі карту касмічнага агенцтва, на якой бачныя пажары пасля выбухаў на тэрыторыі склада.

"Месца ззяе, як калядная ялінка", – напісаў OSINT-аналітык MT Anderson у X. Exilenova+ дадаў, што выбух адбыўся на тэрыторыі 51-га арсенала ГРАУ.

Гэта адзін з самых вялікіх складоў боепрыпасаў мінабароны Расеі. OSINT-аналітык апублікаваў фота арсенала да выбухаў і пажару - на 26 кастрычніка 2024 года.

Telegram-канал Astra паведаміў, што сістэма маніторынгу пажараў FIRMS зафіксавала ўзгаранне на тэрыторыі гэтага арсенала.

На карце пазначаны пяць тэрмапунктаў, якія пакрываюць тэрыторыю тры з паловай квадратныя кіламетры.

Паводле інфармацыі Defense Express, 51-ы арсенал ГРАУ утрымліваў 264 тысячы тоны розных боепрыпасаў і знаходзіўся пад прыкрыццём самай канцэнтраванай сістэмы СПА.

Склад размешчаны ўсяго за 60 км ад Масквы і за 530 км ад мяжы з Украінай.

Партал піша, што, хутчэй за ўсё, на арсенале адбылася дэтанацыя ракет з цвёрдым палівам - зенітных або балістычных, а таксама рэактыўных набояў да сістэм залпавага агню.

Са слоў відавочцаў, выбух быў настолькі магутным, што "грыб" ад яго быў бачны нават за 50 кіламетрах - у Маскоўскай вобласці.

Губернатар Уладзімірскай вобласці Аляксандр Аўдзееў раніцай 23 красавіка заявіў, што дэтанацыя боепрыпасаў на складах "паступова заканчваецца".

У Кіржацкім раёне закрыты школы, шэраг прадпрыемстваў і перацятыя дарогі. У некалькіх населеных пунктах уведзены рэжым НС.

З прычыны разлёту набояў пацярпелі чатыры чалавекі. Са слоў губернатара, некалькі боепрыпасаў упалі на цывільныя аб'екты.

Мінабароны РФ заявіла, што прычынай выбухаў на тэрыторыі вайсковай часці стала парушэнне тэхнікі бяспекі.

Са звестак мясцовых улад, на складзе можа знаходзіцца да 270 тысяч тон боепрыпасаў.

У Кіржацкім раёне працягваецца эвакуацыя, у месцах часовага размяшчэння на раніцу 23 красавіка знаходзіцца 495 чалавек.