Выбухі на найбуйнейшым арсенале РФ: якія боепрыпасы ўзляцелі ў паветра

• 24.04.2025, 10:12

Сярод абломкаў былі знойдзеныя цікавыя фрагменты.

Пасля выбуху 51-га арсенала ГРАУ у РФ выяўлены сляды боепрыпасаў замежнага паходжання. Сярод абломкаў былі знойдзеныя хваставыя часткі рэактыўных набояў, якія вонкава адрозніваюцца ад савецкіх узораў.

Больш падрабязна пра гэта расказалі аглядальнікі Defense Express.

У матэрыяле было адзначана, што пасля выбуху 22 красавіка расейскага 51-га арсенала Галоўнай ракетна-артылерыйскай управы Міністэрства абароны РФ мясцовыя жыхары пачалі знаходзіць фрагменты боепрыпасаў, якія разляцеліся на значныя адлегласці.

Характэрныя асаблівасці канструкцыі, адсутнасць стабілізатараў, паказваюць на іх замежнае паходжанне, як мяркуецца, з Ірана, КНДР або Кітая.

Рэч у тым, што рэактыўныя боепрыпасы 107-мм калібру прызначаныя для сістэм залпавага агню кітайскага паходжання, вядомых пад назовам Typе 63. Гэтыя РСЗА з'яўляюцца аналагам савецкіх усталёвак БМ-14, толькі ў кітайскага варыянту быў зменшаны калібр.

Type 63 і яе шматлікія мадыфікацыі актыўна распаўсюдзіліся па свеце - яны знаходзяцца на ўзбраенні больш як у 30 краінах, пераважна ў Азіі і Афрыцы.

Тактыка-тэхнічныя характарыстыкі кітайскай Type 63

Калібр: 107 мм

Далёкасць страляніны: да 8 км (у мадэрнізаваных версіях - да 11 км)

Вага рэактыўнага набою: 18-19 кг

Маса баявой часткі: каля 8 кг

Таксама існуе паўночнакарэйская версія гэтай сістэмы пад назовам Type 75.

Аўтары публікацыі пішуць, што крыніца гэтых боепрыпасаў на тэрыторыі РФ пакуль не ўстаноўленая. Найбольш верагоднымі пастаўшчыкамі разглядаюцца Іран і КНДР.

Нагадаем, аб'екты, падобныя да 51-й ГРАУ з'яўляюцца не проста складамі для захоўвання боепрыпасаў, а ключавымі вузламі вайсковай лагістыкі. Таму іх знішчэнне можа сур'ёзна паўплываць на магчымасці Расеі ў забеспячэнні фронту.