Найлепшы футбольны арбітр Беларусі адхілены ад працы

• 24.04.2025, 10:23

Апошні матч для яго склаўся вельмі няўдала.

Футбольны суддзя Віктар Шымусік не атрымаў назначэння на чарговы тур чэмпіянату Беларусі. Больш за тое, арбітр не будзе абслугоўваць гульні першай і жаночай ліг, піша «Точка».

Пастанова прынятая дэпартаментам судзейства і інспектавання Асацыяцыі "Беларуская федэрацыя футбола". Адхіленне Шымусіка, магчыма, звязанае з яго працай на цэнтральным матчы 5-га тура вышэйшай лігі паміж менскім "Дынама" і БАТЭ (2:1). Гульня прайшла 19 красавіка, але размовы аб уплыве на яе суддзі не сціхаюць дагэтуль.

Падчас сустрэчы Шымусік прыняў цэлы шэраг спрэчных пастаноў. Самай рэзананснай з іх стаў непрызначаны ў браму чэмпіёнаў пенальці пасля небяспечнай гульні дынамаўца Фарда Ібрагіма.

Заўзятары “бела-сініх” парыруюць сваім візаві з Барысава іншым момантам, які адбыўся крыху раней.

Каментароў федэрацыі наконт адхілення суддзі не з'яўлялася.

Адзначым, што абмеркаванне працы рэферы на афіцыйным узроўні і разгалашэнне ацэнкі інспектара забараняецца спецыяльнай канвенцыяй УЕФА.

Па выніках сезона-2024 Віктар Шымусік быў прызнаны найлепшым арбітрам Беларусі.

Не першы скандал з удзелам Шымусіка

Рэферы ўжо адзначаўся рэзананснымі гісторыямі ў чэмпіянаце-2024.

Галоўным спрэчным момантам, звязаным з суддзёй, быў прызначаны ў браму гарадзенскага "Нёмана" пенальці ў гульні супраць менскага "Дынама".

Нягледзячы на правільнасць прынятай пастановы, арбітр стаў аб'ектам нападак з боку галоўнага трэнера "жоўта-зялёных" Ігара Кавалевіча.