Нідэрландскі палітык прапанаваў Францыі падзяліць тэрыторыю Бэльгіі

• 24.04.2025, 18:03

Нідэрланды могуць забраць Фландрыю, а Францыя - Валонію.

Спікер ніжняй палаты парламента Нідэрландаў Марцін Босма, прадстаўнік ультраправай Партыі свабоды, прапанаваў французскаму амбасадару падзяліць тэрыторыю Бэльгіі паміж Нідэрландамі і Францыяй. Пра гэта піша RTL Info, цытуючы калонку нідэрландскай журналісткі Петры дэ Конінг.

Паводле інфармацыі медыя, Босма выказаў гэтую ідэю паслу Францыі Франсуа Алабруну падчас вячэры.

«Нідэрланды хочуць, каб Фландрыя далучылася да іх. Валонія зможа перайсці да Францыі», - сказаў ён.

Гэтыя словы шакавалі французскага дыпламата і некалькіх прысутных на мерапрыемстве дэпутатаў. Пазней Босма паспрабаваў растлумачыць сваю заяву: "На такіх вечарах мы абмяркоўваем палітыку і магчымыя сцэнары развіцця падзей".

Ідэя аб'яднання Фландрыі з Нідэрландамі набірае папулярнасць сярод правых палітычных сіл у Нідэрландах. Гэты пункт гледжання падтрымлівае прэм'ер-міністр Герт Вілдэрс, які выступае за стварэнне "Вялікіх Нідэрландаў". Такая канцэпцыя прадугледжвае ўключэнне Фландрыі - паўночнага рэгіёну Бэльгіі, дзе гавораць фламандскім дыялектам нідэрландскай мовы.

Акрамя таго, такія ідэі маюць падтрымку і сярод некаторых бэльгійскіх палітычных сіл. Партыя "Фламандскі інтарэс" (Vlaams Belang) і прэм'ер-міністр Бэльгіі Барт дэ Вевер, лідар сепаратысцкай партыі "Новы фламандскі альянс", таксама выказваюць падтрымку ідэі незалежнасці Фландрыі ці нават яе ўз'яднанню з Нідэрландамі.

Не менш супярэчнасцяў існуе і ў іншым рэгіёне Бэльгіі - Валоніі. У паўднёвым, франкамоўным рэгіёне ёсць сепаратысцкія сілы, якія падтрымліваюць ідэі далучэння да Францыі ці нават здабыцця незалежнасці. Гэтыя імкненні ўзнікаюць праз глыбокія супярэчнасці паміж двума рэгіёнамі: Фландрыя, з мацнейшай эканомікай, часта разглядае Валонію як цяжар, тады як у Валоніі фламандцаў часам успрымаюць як напышлівых і бязлітасных.