На выходныя ў Беларусь ідуць замаразкі і снег

• 25.04.2025, 9:35

Сіноптыкі расказалі пра надвор'е ў Беларусі ў найбліжэйшыя тры дні.

У найбліжэйшыя дні ў Беларусі чакаецца прыкметнае пагаршэнне ўмоў надвор'я: сіноптыкі папярэджваюць аб замаразках, мокрым снезе і моцным ветры.

У пятніцу, 25 красавіка, у краіне ўсталюецца пераменная воблачнасць. Уначы і раніцай месцамі пройдуць кароткачасовыя дажджы. Удзень ападкі магчымыя пераважна на поўдні, дзе таксама прагназуюцца навальніцы. Тэмпература ўночы ад +3 да +8°С, на поўдні да +11°С. Удзень ад +10°С на паўночным захадзе да +24°С на паўднёвым усходзе.

26 красавіка ў Беларусь прыйдзе халодная паветраная маса з поўначы Еўропы. Часам пройдуць дажджы, а ўдзень месцамі магчымы мокры снег. Чакаюцца парывісты вецер і замаразкі да -4°С уначы. Удзень тэмпература паветра не падымецца вышэй за +13°С.

У нядзелю захаваецца ўплыў халоднага антыцыклону. Будзе пераважна суха, але па паўночным усходзе магчымыя кароткачасовыя ападкі, у асноўным у выглядзе мокрага снегу. Начныя замаразкі захаваюцца па большай частцы краіны. Удзень тэмпература складзе да +14°С.