У Расеі другі самалёт «Перамога» за тыдзень здзейсніў экстранную пасадку
- 27.04.2025, 19:34
Прычына – разгерметызацыя.
Самалёт Boeing 737-800 авіякампаніі «Перамога», які ляцеў з Масквы ў Нальчык, быў вымушаны вярнуцца ў аэрапорт вылету праз разгерметызацыю, піша Baza. Капітан паветранага карабля запытаў аварыйную пасадку ў Шарамеццева амаль адразу пасля ўзлёту праз спрацавалы датчык аб няспраўнасці. Перад гэтым борт зрабіў некалькі колаў, каб выпрацаваць паліва. Экстранныя службы паведамілі, што самалёт прызямліўся штатна.
Гэта ўжо другі такі выпадак за тыдзень. 23 красавіка сігналізацыя пра разгерметызацыю спрацавала на рэйсе «Перамогі» Масква – Санкт-Пецярбург. У салоне выпалі кіслародныя маскі, нястача паветра і рэзкае зніжэнне самалёта выклікалі паніку сярод пасажыраў. У выніку Boeing 737 усё ж прызямліўся ў Пулкаве. Пасля пасадкі некаторым людзям спатрэбілася экстранная медыцынская дапамога. Таксама 27 красавіка яшчэ адзін самалёт «Перамога» рэйсам Масква – Магас экстранна сеў у Валгаградзе праз смерць 75-гадовага пасажыра, паведамляе «Авіятаршчына».
Усяго з пачатку месяца адбылося як мінімум шэсць выпадкаў паломкі самалётаў расейскіх авіякампаній у паветры. 22 красавіка Boeing-738 «Перамога», які рухаўся з Санкт-Пецярбурга ў Кіраў, здзейсніў экстранную пасадку ў Шарамеццеве. Экстранныя службы паведамілі, што прычынай стала «зніжэнне параметраў ціску ў гідрасістэме». Лайнер прызямліўся штатна.
18 красавіка самалёт «Суперджэт» (Sukhoi Superjet 100) авіякампаніі «Расея», які выконваў рэйс з Санкт-Пецярбурга ў Маскву, запытаў аварыйную пасадку ў сталічным аэрапорце Унукава праз паломку шасі.
12 красавіка Boeing 777 «Аэрафлота», які ляцеў з Масквы ў Гуанчжоу (Кітай), экстранна сеў у Новасібірску праз няспраўнасць. Самалёт быў вымушаны развярнуцца над Саяна-Шушанскім запаведнікам пасля спрацоўвання індыкацыі ўзроўню алею ў адным з рухавікоў. Пасадка прайшла ў штатным рэжыме.
А 10 красавіка зламаўся ў паветры самалёт «Аэрафлота», які рухаўся па маршруце Масква – Дэнпасар (Інданэзія). Airbus A350 знаходзіўся на мяжы з Казахстанам, калі яму давялося развярнуцца ў аэрапорт вылету – Шарамеццева. Прычынай стала адмова рухавіка.