СМІ назвалі імёны міністраў у кабінеце новага канцлера Нямеччыны

• 27.04.2025, 21:09

Упершыню за 60 гадоў МЗС краіны ўзначаліць прадстаўнік ХДЗ.

Намеснік кіраўніка фракцыі ХДЗ/ХСЗ у бундэстагу Ёхан Вадэфул стане міністрам замежных справаў ва ўрадзе Фрыдрыха Мерца, паведамляе n-tv. Вадэфул стане першым кіраўніком МЗС ад ХДЗ амаль за 60 гадоў.

Міністарка адукацыі зямлі Шлезвіг-Гальштэйн Карын Прын, таксама з ХДЗ, узначаліць федэральнае Міністэрства адукацыі. Міністаркай эканомікі прызначаць былую дэпутатку бундэстага ад ХДЗ Кацярыну Райхэ.

Даратэя Бэр з ХСЗ стане кіраўніцай Міністэрства навуковых даследаванняў, тэхналогій і космасу, Аляксандр Добрынд, таксама з ХСЗ, – міністрам унутраных справаў.

ХДЗ і ХСЗ дамовіліся аб прызначэнні былога міністра аховы здароўя Енса Шпана кіраўніком фракцыі блоку ў парламенце.

Згодна з кааліцыйным пагадненнем, ХДЗ прызначыць сем з 17 міністраў, як і СДПН, ХСЗ – трох міністраў.