У Суджу праз газавую трубу: расейскія вайскоўцы атрымалі пашкоджанні лёгкіх

• 29.04.2025, 2:31

Інфармацыю пацвердзіў камандзір спецназа «Ахмат» Апці Алаўдзінаў.

Большасць байцоў спецназа «Ахмат» з групы Аіда, якія прапаўзлі праз газавую трубу да горада Суджа Курскай вобласці, каб выбіць адтуль Узброеныя сілы Украіны, цяпер знаходзяцца ў шпіталях з праблемамі лёгкіх. Пра гэта паведаміў намеснік начальніка Галоўнай вайскова-палітычнай управы УС РФ і камандзір спецназа «Ахмат» генерал-лейтэнант Апці Алаўдзінаў, паведамляюць расейскія СМІ.

«Большасць дагэтуль знаходзіцца на лячэнні, бо час, праведзены непасрэдна ў гэтай трубе, сапраўды моцна паўплываў на іх унутраныя органы. Лёгкія і дыхальныя шляхі сапраўды былі пашкоджаныя», — расказаў ён агенцтву, адзначыўшы, што некаторыя вайскоўцы пайшлі на папраўку.