Пад Віцебскам дарогу парамантавалі дзіўным спосабам

• 3.04.2025, 21:49

Відэафакт.

У вёсцы Паляі пад Віцебскам дарожнікі зрабілі доўгачаканы рамонт, які выклікаў у мясцовых жыхароў здзіўленне: у ямы ў пяску засыпалі адпрацаваны асфальт, звярнуў увагу тэлеграм-канал «Віцебск, я гуляю!».

Мясцовая жыхарка ў TikTok расказала, што гэта ўжо не першая спроба аднаўлення дарогі. Папярэдні раз быў пяць гадоў таму, ён быў у тым, што дарогу засыпалі магільным пяском.

Пасля гэтага жыхары сталі калектыўна скардзіцца, і вось прыйшоў адказ на іх скаргі – дарожнікі з'явіліся. Але тое, што яны рабілі, прымусіла жанчыну запісаць ролік:

«Зноў жа нейкім незразумелым метадам. Засыпаную пяском дарогу рамантуюць адпрацаваным асфальтам. Як я разумею, першыя дажджы яго вымыюць».

Вяскоўка адзначыла: яе «мозг кажа, што нешта робіцца не так», і папрасіла дасведчаных людзей расказаць, ці нармальна так рабіць дарогі.

Ёй адказалі, што «такая дарога – гэта ў прынцыпе ненармальна, не тое што такі каравы рамонт», і прапанавалі пісаць скаргі.