Паліна Шарэнда-Панасюк заклікала выратаваць Вікторыю Кульшу
- 30.04.2025, 10:31
Палітычная зняволеная знаходзіцца на мяжы жыцця і смерці.
Былая палітзняволеная, актывістка грамадзянскай кампаніі “Еўрапейская Беларусь” Паліна Шарэнда-Панасюк заклікалаВікторыю Кульшу, якая павінна была выйсці на волю 6 красавіка:
- Вікторыя Кульша з моманту змяшчэння ў СІЗА-3 Гомеля абвясціла бестэрміновую галадоўку! Гэта яе шостая галадоўка за час зняволення, і гэтым разам — да канца: альбо мы даможамся яе вызвалення, альбо яна загіне.
Тое, што адбываецца з Вікторыяй Кульшай інакш як забойствам назваць нельга! Супраць яе акупацыйны рэжым сфабрыкаваў ужо пятую крымінальную справу, і яе чацвёрты раз збіраюцца судзіць паводле палітычна матываваных абвінавачванняў паводле сумнавядомага артыкула 411 («непадпарадкаванне адміністрацыі калоніі»). Гэта проста жахлівы здзек з чалавека, помста хунты нязломнай жанчыне.
Перад тым, як мяне вызвалілі ў лютым 2025 года, я бачыла Вікторыю Кульшу ў калоніі №24. Яна выглядала як жывы нябожчык: бледная скура, моцнае знясіленне, ледзь перасоўвалася, у яе быў моцны ацёк твару. Я ведала, што з — за папярэдніх галадовак і жудасных пакут бясконцымі штрафнымі ізалятарамі ў яе пачаліся сур'ёзныя праблемы з сэрцам, ныркамі і гінекалогіяй - аж да крывацёкаў! І ў такім стане 8 студзеня 2025 года яе зноў кінулі на 60 дзён у штрафны ізалятар, дзе проста катавалі холадам, наўмысна не зачыняючы фортку ў камеры зімой. А па сценах «адрамантаванай» камеры цякла вада... Паралельна аператыўнік ПК-24 Дзмітрый Саманчук, не выходзячы з цёплага кабінета, чыніў службовае злачынства, фабрыкуючы на Вікторыю новую «крымінальную справу» паводле артыкула 411.
Але да гэтага «суда» Вікторыя Кульша можа проста не дажыць! Яна працягвае барацьбу і адмаўляецца ад якога-небудзь супрацоўніцтва з хунтай: прызнаваць віну, здраджваць актывістам, дэзінфармаваць грамадскасць «пакаяннымі» відэа. Гэта яе прынцыповы выбар. Мне вядома, што за гады зняволення Вікторыя некалькі разоў абвяшчала галадоўкі, некаторыя з якіх заканчваліся шпіталізацыяй. Пратэстуючы супраць беззаконня, Кульша тройчы спрабавала пакончыць з сабой, на што рэжым адказваў штрафным ізалятарам і карнай псіхіятрыяй.
Яшчэ ў калоніі Вікторыя сказала мне, што ў выпадку новага абвінавачвання яна зноў абвесціць галадоўку і гэтым разам пойдзе да канца. Я ведаю, што, нягледзячы на ўтойванне рэжымам інфармацыі аб стане Вікторыі Кульшы, яна знаходзіцца ў крытычным псіхалагічным і фізічным стане. Бясконцыя суды, этапы і доўгія месяцы ў штрафным ізалятары давялі яе да мяжы жыцця і смерці. На гэты раз Вікторыя прынцыпова пастанавіла ісці да канца. Ведаючы яе прынцыповасць, гэта гучыць як смяротны прысуд, бо, калі яе цяпер зноў адправяць у лукашэнкаўскі канцлагер, там яе даб'юць!
Вікторыя Кульша можа стаць першай жанчынай-палітвязнем, якая загінула ў лукашэнкаўскіх пастарунках! Яе магчымая гібель, безумоўна, будзе на сумленні акупацыйнага рэжыму, яго катаў і кожнага калабаранта! Але гэта забойства можа адбыцца на нашых вачах! Мы дапусцім яго?! Вызваленне Беларусі немагчымае без вызвалення асобных герояў беларускага супраціву!
Прашу беларускую і міжнародную грамадскасць, палітыкаў, дыпламатаў, дэпутатаў, журналістаў зрабіць усё магчымае для выратавання Вікторыі Кульшы!