Эканоміка ЗША за Трампам скарацілася ўпершыню з 2022 года

• 30.04.2025, 19:38

У першым квартале года ВУП ЗША ўпаў на 0,3%.

У першым квартале 2025 года рэальны ВУП ЗША знізіўся на 0,3% у пераразліку на гадавыя тэмпы (annual rate), паведаміла Бюро эканамічнага аналізу пры Мінгандлю ЗША (BEA).

Для параўнання ў апошнім квартале мінулага года рэальны ВУП вырас на 2,4%.

"Зніжэнне рэальнага ВУП у першым квартале ў першую чаргу адлюстравала рост імпарту, які адымаецца пры разліку ВУП, і памяншэнне дзяржаўных выдаткаў. Гэтыя змены былі часткова кампенсаваныя ростам інвестыцый, спажывецкіх выдаткаў і экспарту”, — адзначылі ў BEA.

Bloomberg адзначае, што эканоміка ЗША скарацілася ўпершыню з 2022 года. Сярэдні рост у папярэднія два гады быў блізу 3%.

Рост імпарту агенцтва звязала з закупкай бізнэсам тавараў перад увядзеннем прэзідэнтам Дональдам Трампам мытаў.

“Калі спад у гандлі быў вынікам таго, што кампаніі загадзя закуплялі імпартныя рэсурсы, каб абысці мыты, то ў другім квартале спад гандлёвага балансу вернецца назад. Гэта прывядзе да некаторага росту ВУП. Аднак пагібельная нявызначанасць і больш высокія падаткі (мыты — гэта падатак на імпарт) зноў зацягнуты рост ВУП у мінус да канца гэтага года”, — мяркуе галоўны эканаміст High Frequency Economics Карл Вайнбэрг.

Financial Times адзначае, што ў сярэдзіне красавіка МВФ панізіў прагноз аб росце ВУП ЗША да +1,8% у гэтым годзе, у той час як у студзеньскім прагнозе быў закладзены рост на 2,7%.