Беларусцы адмовілі ў пенсіі, нягледзячы на 30 гадоў стажу

• 7.04.2025, 12:20

У чым прычына?

Жыхарцы Берасця адмовілі ў прызначэнні пенсіі, хаця яе стаж разам з вучобай і дэкрэтным адпачынкам большы за 30 гадоў. Адмову патлумачылі адсутнасцю страхавога стажу.

Жанчына пацікавілася, ці можа гэта быць звязанае з тым, што ў працоўнай кніжцы няма запісаў аб рабоце па дамовах найму, піша 1prof.by.

Згодна з законам «Аб пенсійным забеспячэнні», у стаж для назначэння пенсіі ўваходзяць перыяды афіцыйнай работы, пацверджаныя запісамі ў працоўнай кніжцы, і работа па грамадзянска-прававых дамовах (дамовах найму), растлумачыла прававы інспектар працы Берасцейскай абласной арганізацыі прафсаюза банкаўскіх і фінансавых работнікаў Святлана Тарасевіч. Апошнія рэгулююцца не Працоўным, а Грамадзянскім кодэксам, таму ў працоўную кніжку інфармацыя аб іх не ўносіцца.

Калі па дамове найму чалавек атрымліваў менш за мінімальны заробак, то ў страхавы стаж гэты перыяд могуць залічыць не цалкам. У такіх выпадках ужываецца паправачны каэфіцыент: сярэднямесячны даход дзеліцца на сярэдні мінімальны заробак за гэты перыяд. Калі каэфіцыент меншы за 1, стаж памяншаецца прапарцыйна.

Такім чынам, калі чалавек доўгі час працаваў па дамовах найму з нізкім прыбыткам, гэта можа адбіцца на яго пенсіі. Каб пазбегнуць такіх сітуацый, важна загадзя правяраць свой страхавы стаж і ўлічваць правілы налічэння пенсійных выплат.

Тым не менш тыя, у каго бракуе страхавога стажу, усё адно могуць выйсці на пенсію на агульных падставах. Для гэтага патрабуецца агульны працоўны стаж, не меншы за 20 гадоў для жанчын (пры дасягненні 60 гадоў) і 25 гадоў для мужчын (пры дасягненні 65 гадоў).