У берасцейскім каледжы правялі паказальны суд паводле палітычнага артыкула

• 8.04.2025, 15:07

Мужчыну абвінавацілі ў «публічнай абразе» Лукашэнкі.

Суд Маскоўскага раёна Берасця 2 красавіка правёў выязное пасяджэнне ў актавай зале політэхнічнага каледжа Берасцейскага тэхналагічнага ўніверсітэта. Мужчыну, імя якога не вядомае, было выстаўленае абвінавачанне паводле ч. 1 арт. 368 КК (публічная абраза Лукашэнкі), піша BG.media.

У чым канкрэтна абвінавачвалі мужчыну, у прэс-службе не расказалі. Суддзя Марыя Аліферук прызнала яго вінаватым і прызначыла два гады абмежавання волі без накіравання ў папраўчую ўстанову адкрытага тыпу («хатняй хіміі»).

Прысуд не ўступіў у законную сілу, можа быць абскарджаны і апратэставаны.

Працэс над мужчынам быў «паказальным» - перад навучэнцамі політэхнічнага каледжа.