Стала вядома, хто змяніў стаўленне Трампа да Пуціна
- 1.05.2025, 8:42
Да прэзідэнта ЗША ўдалося данесці, што кіраўнік Крамля праяўляе да яго непавагу.
Прэзідэнт ЗША Дональд Трамп крыху змяніў рыторыку пра расейскага дыктатара Уладзіміра Пуціна пасля некалькіх месяцаў непублічных дыпламатычных намаганняў прэм'ер-міністра Вялікабрытаніі Кіра Стармера і прэзідэнта Францыі Эмануэля Макрона.
Як піша Politico са спасылкай на крыніцы сярод еўрапейскіх палітыкаў, і Стармер і Макрон пераконвалі Трампа не ціснуць на ўкраінскага прэзідэнта Уладзіміра Зяленскага і накіраваць частку сваёй злосці на Пуціна. Для гэтага яны выкарыстоўвалі аргумент, што Пуцін выстаўляе амерыканскага прэзідэнта дурнем.
"Публічная крытыка прэзідэнта ЗША на адрас Пуціна дазволіла дыпламатам у Лондане і Парыжы стрымана парадавацца, бо іх намаганні на працягу апошніх трох месяцаў пачалі прыносіць плён", - напісала выданне.
Выданне дэталізавала, што ключавую ролю ў перамовах з камандай Трампа адыгралі брытанскія дарадца ў нацыянальнай бяспецы Джонатан Паўэл і міністр абароны Джон Хілі. Іх намаганні каардынаваліся з паслом ЗША ў Вялікабрытаніі Маркам Бэрнетам.
А міністр замежных спраў Вялікабрытаніі Дэвід Лэмі прызнаўся, што толькі сёлета правёў 13 размоў з дзяржсакратаром ЗША Марка Рубіё, Стармерам і Трампам - "амаль" столькі ж.
“Зяленскі адназначна паўплываў на ход думак Трампа ў Рыме”, - сказаў адзін з брытанскіх экс-амбасадараў. Ён адзначыў, што Вялікабрытанія і Францыя ўвесь час падкрэслівалі, што Пуцін "праяўляе непавагу да Трампа, увесь час парушаючы замірэнне, якое сам жа і абвясціў". Дыпламат выказаў меркаванне, што гэта стала асабліва адчувальнай тэмай, паколькі Трамп "чула рэагуе на чалавечыя ахвяры - гэта яго сапраўды турбуе".
“Цяпер Трамп зразумеў, што Пуціну нельга давяраць. Гэта тое, што Макрон увесь час паўтарае і спрабуе данесці да Трампа. Гэта нашая цяперашняя стратэгія», - дэталізаваў французскі чыноўнік.
Аднак, як адзначае Politico, Вялікабрытанія і Францыя зараз з трывогай чакаюць, ці надоўга хопіць жорсткай пазіцыі Трампа ў дачыненні да Пуціна.
Аналітык Brookings Institution і экс-амбасадар ЗША ва Украіне Стывен Пайфер адзначыў, што “ў Трамп была сляпая зона ў дачыненні да Пуціна, які ігнараваў запыты ЗША”. "Але яго свежыя заявы намякаюць на тое, што ён пачаў адчуваць, што Пуцін яго выкарыстоўвае", – прааналізаваў Пайфер.