Бэсэнт: Зяленскі зараз мае «раял-флэш» у перамовах з РФ

• 1.05.2025, 19:42

З яго слоў, зараз паміж народамі Украіны і ЗША няма рознагалоссяў.

Міністр фінансаў ЗША Скот Бэсэнт абнавіў фразу прэзідэнта Дональда Трампа, які заяўляў, што ўкраінскі лідар Уладзімір Зяленскі «не мае карт» у перамовах з расейцамі. У эфіры Fox Business ён выказаў меркаванне, што цяпер, пасля падпісанай дамовы аб карысных выкапнях, у прэзідэнта Украіны ёсць «раял-флэш».

«Ведаеце, як прэзідэнт Трамп казаў у Авальным кабінеце Зяленскаму: «У вас няма козыраў». Ну, ведаеце што? Прэзідэнт Трамп цяпер раздаў яму раял-флэш», - заявіў Бэсэнт.

З яго слоў, зараз гэтыя карты можна паказваць Крамлю. Ён падкрэсліў, што яны паказваюць адсутнасць рознагалоссяў у мэтах народаў Украіны і ЗША.

Раял-флэш з'яўляецца самай высокай камбінацыяй у покеры. Яна складаецца з пяці старэйшых карт аднолькавай масці: туза, караля, дамы, валета і дзясяткі.