Пуціна паставілі ў няёмкае становішча падчас параду
- 10.05.2025, 14:16
Амерыканскія аналітыкі раскрылі дэталі.
Акупанты правалілі ўсе мэты Пуціна да 9 траўня
Расейскае войска загразла ў баях ва Украіне
Таму Пуціну не было чаго казаць пра вайну супраць Украіны на парадзе і давялося выкручвацца.
Расейскае акупацыйнае войска за год не дасягнула ніводнай з мэт, якія ставіў перад ёй расейскі дыктатар Уладзімір Пуцін. Захопнікам так і не ўдалося захапіць ніводнага значнага горада ва Украіне пасля акупацыі Аўдзееўкі ў лютым мінулага года, таксама яны не змаглі выйсці на адмінмежы Данецкай і Луганскай абласцей.
Таму кіраўніку Крамля Пуціну не было чаго сказаць пра вайну супраць Украіны падчас свайго выступу на парадзе 9 траўня, акрамя толькі таго, што Расея «падтрымлівае» акупантаў, якія ваююць на тэрыторыі суседняй дзяржавы. На гэта звярнулі ўвагу аналітыкі амерыканскага Інстытута вывучэння вайны (ISW).
Аналітыкі адзначылі, што ўкраінскія вайскоўцы пры падтрымцы заходніх партнёраў не дазволілі расейскім акупантам дасягнуць ніводнай «мэты», якая была заяўленая Крамлём. Таму Пуціну падчас выступу на парадзе давялося абмяжоўвацца толькі агульнымі фразамі аб так званай «СВА». Бо ў захопнікаў проста не было такіх дасягненняў, якімі можна было б пахваліцца.
«Расейскія войскі не захапілі ніводнага значнага горада ва Украіне з моманту захопу Аўдзееўкі ў лютым 2024 года, а адзіным сярэднім населеным пунктам, які расейскія войскі захапілі ва Украіне са снежня 2024 года, з'яўляецца Вялікая Навасёлка (даваеннае насельніцтва 5000 чалавек)», - адзначылі ў ISW.
Аналітыкі нагадалі, што ў СМІ яшчэ перад парадам у Маскве гучала інфармацыя аб тым, што расейскія акупанты спрабуюць захапіць Пакроўск, Часаў Яр, Тарэцк, а таксама неакупаваную імі частку Луганшчыны, а ў Данецкай вобласці ажыццяўляюць спробы выйсці на адмінмяжу з Днепрапятроўскай вобласцю. Адзначалася, што для гэтага акупантам устанавілі крайні тэрмін 9 траўня. Аднак захопнікі ў такі тэрмін не ўклаліся.
У ISW выказалі перакананне, што Украіна змагла запаволіць, а часам нават цалкам спыніць прасоўванне расейскіх акупантаў дзякуючы дальнабойным ударам і палепшанай інтэграцыі тактычных аперацый дронаў з абарончымі аперацыямі і контратакамі.
«Паспяховая інтэграцыя Украінай украінскіх наватараў і аператараў беспілотнікаў з наземнымі войскамі, здаецца, спыніла наступ Расеі на Пакроўск і Тарэцк у 2024 і ў пачатку 2025 гадоў. Украінскія дальнабойныя ўдары па расейскіх складах боепрыпасаў, аб'ектах абароннай прамысловасці і нафтагазавай інфраструктуры часам падрывалі здольнасць Расеі пастаўляць падраздзяленні на перадавой і ўзмацнялі рост выдаткаў на вайну Расеі супраць Украіны», - адзначылі ў ISW.