У Смалявіцкім раёне пяцігадовае дзіця выпала з акна пятага паверха

• 12.05.2025, 16:03

Лекары змагаюцца за яго жыццё.

Пяцігадовы хлопчык выпаў з акна кватэры, размешчанай на пятым паверсе жылога дома. Дзіця з цяжкімі траўмамі было экстранна дастаўленае ў шпіталь. Медыкі працягваюць змагацца за ягонае жыццё, паведамілі ў прэс-службе Следчага камітэта.

Інцыдэнт адбыўся 10 траўня ў вёсцы Зарэччы. Паводле папярэдніх звестак следства, у момант здарэння дзіця знаходзілася пад наглядам бабулі. Жанчына, як устанавілі следчыя, ненадоўга выйшла з кватэры, пакінуўшы ўнука аднаго. Гэтага было дастаткова, каб адбылася трагедыя.

Вядома, што бацькі хлопчыка не ўдзельнічаюць у яго выхаванні і злоўжываюць алкаголем. З трохмесячнага ўзросту дзіця даглядае бабуля.

Смалявіцкі раённы аддзел Следчага камітэта праводзіць праверку. Устанаўліваюцца ўсе акалічнасці здарэння, а таксама прычыны і ўмовы, якія прывялі да падзення дзіцяці.