«Увосень Расея пасыплецца, паўночнакарэйцы не дапамогуць»

• 15.05.2025, 19:51

Z-ваенкар спрагназаваў крах расейскай эканомікі.

Расейскі Z-ваенкар Максім Калашнікаў заявіў аб неабходнасці тэрмінова згортваць «СВА», бо расейская эканоміка не вытрымлівае.

Крэмль змушаны ісці на дамоўленасці з Украінай і Амерыкай, бо не выцягвае працяг вайны на знясіленне. Пра гэта ў сваім блогу распавёў расейскі «Раззлаваны патрыёт», Z-ваенкар Максім Калашнікаў, паведамляе Dialog.UA.

«Першая асоба (дыктатар РФ Уладзімір Пуцін - рэд.) пагадзіўся з тым, што ён пойдзе на перамовы, працягне перамовы ў Стамбуле. Зяленскі сказаў, што туды едзе. Тут усякая лухта пайшла, што "мы іх перайгралі", "мы перахапілі ініцыятыву". Але ў выніку атрымалася, што ініцыятыву ўсё адно перахапілі яны… Я прыходжу да адной высновы, чаму Пуцін ідзе на перамовы… Бо эканоміка пачынае падціскаць. Яны разумеюць, што пераламаць хаду баявых дзеянняў не могуць, а працягваць да бясконцасці нельга. Эканоміка знаходзіцца ў вельмі дрэнным становішчы. Яна можа пачаць увосень разбурацца. А калі ў цябе разбураецца эканоміка, ты не можаш весці вайну. І ніякія паўночнакарэйцы не дапамогуць, ім плаціць трэба, дакладней, іх кіраўніцтву плаціць трэба», - распавёў Калашнікаў.

Ён упэўнены, што на новую мабілізацыю Пуцін пайсці не наважыцца, бо баіцца хваляванняў унутры краіны. А страты расейскага войска занадта вялікія, каб і далей працягваць агрэсію. Украіна, са слоў Z-патрыёта, вельмі паспяхова адбівае расейскія атакі, бо «на крок наперадзе» ў пытанні дронаў.