Наталля Радзіна: Лукашысты прабрахаліся пра вучэнні «Захад-2025»
- 29.05.2025, 15:20
Украінцы і еўрапейцы могуць адказаць на правакацыі.
Галоўная рэдактарка сайта Charter97.org Наталля Радзіна дала вялікае інтэрв'ю YouTube-каналу вядомага журналіста Яўгена Кісялёва. Адна з галоўных тэм размовы - небяспека расейска-беларускіх вучэнняў «Захад-2025», якія пройдуць у нашай краіне ўвосень.
Наталля Радзіна мяркуе, што Пуцін можа выкарыстоўваць гэтыя манеўры для нападу на краіны Балтыі і Польшчу:
- На месцы еўрапейскіх палітыкаў я б не супакойвала сябе, што пакуль Пуцін вядзе вайну супраць Украіны і не нападзе на краіны-чальцы НАТА. Сёння для яго вельмі зручны момант, калі мы бачым, што ЗША самаўхіліліся і ніяк не рэагуюць на нахабства Пуціна - на працяг вайны, узмацненне атак супраць Украіны. Для расейскага дыктатара зараз ідэальны час, каб наступаць па ўсіх кірунках.
Навошта яму чакаць, пакуль Еўропа пераўзброіцца, мадэрнізуе свой вайскова-прамысловы комплекс, свае войскі? Для яго зараз самы зручны момант.
Вайна сёння змянілася і стратэгічна, і тактычна. Ідзе вайна дронаў, і мы ведаем, што Расея вырабляе БПЛА ў велізарнай колькасці, і тэхнічныя характарыстыкі ў іх сёння перасягаюць украінскія дроны. Мы бачым гэта па масаваных ударах па ўкраінскіх гарадах у апошнія дні. У гэтай сітуацыі ўявіце сабе, што гэтыя дроны ў вялікай колькасці паляцяць на Вільню, на Даўгаўпілс, на Нарву. Ці паспеюць зрэагаваць краіны Балтыі? Для захопу гэтых тэрыторый не спатрэбіцца шмат вайскоўцаў або расейскай тэхнікі, якая, як вядома, сёння задзейнічаная ва Украіне.
Галоўная рэдактарка сайта Charter97.org звярнула ўвагу на тое, што лукашысты прабрахаліся пра вучэнні «Захад-2025»:
- Начальнік факультэта Генеральнага штаба Узброеных сіл Вайсковай акадэміі Беларусі Андрэй Багадзель сказаў даслоўна наступнае: «Гэтыя вучэнні не будуць мець абстрактны характар. Вучэнні будуць накіраваныя супраць заходніх краін, улічаць досвед вайны з Украінай і адпрацуюць ядзерны ўдар». Гэта значыць, на гэтых вучэннях будуць адпрацоўвацца нанясенні ўдараў ядзернымі тактычнымі ракетамі.
На гэты момант ядзерных ракет на тэрыторыі Беларусі няма. Я пра гэта шмат разоў казала, і гэтую інфармацыю нядаўна пацвердзіла ўкраінская выведка. На тэрыторыі Беларусі ёсць носьбіты для ядзерных ракет - самалёты і ракетныя комплексы «Іскандэр», але непасрэдна ракет - няма, бо няма сховішча для іх.
Цяпер яно будуецца. Вядома, што гэтае сховішча абсталюецца пад Асіповічамі. Гэта горад у Магілёўскай вобласці, за 100 кіламетраў ад Менска і за 190 кіламетраў ад украінскай мяжы. Гэта буйны чыгуначны вузел, які звязвае Асіповічы як з Менскам, так і з Гомелем. Досыць хутка па чыгунцы можна накіраваць ракеты ў бок украінскай мяжы, але гэта будзе неабавязкова, бо побач са сховішчам будуць размяшчацца ракетныя комплексы «Іскандэр». Таксама ёсць і вайсковы аэрадром, з якога ў кожны момант можна падняць самалёты з ядзернымі тактычнымі ракетамі. Таму пагроза захоўваецца, нават нягледзячы на тое, што на гэты момант на тэрыторыі Беларусі няма тактычнай ядзернай зброі. Яе могуць у кожны момант даставіць самалётамі.
Наталля Радзіна расказала, чаму Захад і Украіна не павінны верыць у заявы будучых вучэннях:
- Варта адзначыць, што выйшла інтэрв'ю міністра абароны Беларусі Хрэніна, які заявіў, што нібыта вучэнні «Захад-2025» носяць абарончы характар і не будуць накіраваныя супраць краін Захаду.
Ён сказаў, што «вучэнні будуць праходзіць у глыбіні краіны, а войскі будуць адведзеныя ад заходніх межаў». Але я нагадаю, што гэта заявіў той самы міністр абароны Хрэнін, які тэлефанаваў напярэдадні 24 лютага 2022 года кіраўніку Мінабароны Украіны Аляксею Рэзнікаву і запэўніваў яго, што не будзе нападу з тэрыторыі Беларусі. Хрэнін хлус, верыць яму нельга.
Яўген Кісялёў выказаў меркаванне, што калі б у 2022 годзе Узброеныя сілы Украіны зайшлі ў Беларусь, гэта змяніла б ход вайны:
- Ад многіх людзей ужо чуў, што была такая магчымасць, але УСУ не скарысталіся ёю. Увосень 2022 года, калі ўкраінскія войскі перайшлі ў контрнаступленне, прынамсі, у Херсонскай, Харкаўскай абласцях, былі ўсе прававыя падставы адказаць дыктатарскаму рэжыму Лукашэнкі, бо Беларусь тады наўпрост суўдзельнічала ў расейскай агрэсіі супраць Украіны.
Я згодны з тымі экспертамі, якія мяркуюць, што, магчыма, падзенне рэжыму Лукашэнкі было б значна большай непрыемнасцю для Пуціна, чым страта невялікай часткі тэрыторыі Украіны, аперацыя ў Курскай вобласці РФ.
Наталля Радзіна пагадзілася, што такая аперацыя нанесла б сур'ёзныя страты пуцінскаму рэжыму:
- Калі б тады ўкраінскае войска ўвайшло ў Беларусь, беларусы віталі б украінцаў і тут жа ўспыхнула б паўстанне. Беларускае войска перайшло б на бок украінскага, я перакананая ў гэтым.
Але не выстарчыла рашучасці ні на такую аперацыю, ні на нанясенне ўдараў у адказ па вайсковых аб'ектах і месцах збору расейскіх войск на тэрыторыі Беларусі. Украіна таксама мела на гэтае абсалютнае права. Памятайце, нават прэзідэнт Украіны Уладзімір Зяленскі казаў, што «так, была такая магчымасць, Лукашэнка гэтага вельмі моцна баяўся, але мы надумалі так не рабіць».
Гэта, вядома, была вялікая памылка, бо я перакананая, што Беларусь - гэта адзін з ключавых элементаў перамогі Украіны ў вайне супраць Расеі.
Галоўная рэдактарка сайта Charter97.org пракаментавала таксама бульбяны дэфіцыт у Беларусі, справакаваны рэжымам Лукашэнкі:
— Бульба для беларусаў — гэта другі хлеб. Беларусь заўсёды славілася тым, што вырошчвала бульбу ў вялікай колькасці, а зараз у крамах татальны дэфіцыт гэтага прадукту. Больш за тое, няма не толькі бульбы, няма іншай гародніны — капусты, цыбулі, яблыкаў.
Гэта значыць, знік шэраг прадуктаў першай неабходнасці, якія заўсёды былі на прылаўках. Перыядычна нешта з'яўляецца па значна больш высокіх коштах і тлумачыцца гэта тым, што ўся бульба, якую вырасціла Беларусь, была вывезеная і прададзеная ў Расею. Гэта таксама гаворыць аб гаротным становішчы сельскай гаспадаркі ў Беларусі.
Калгасы глыбока стратныя. Сёння сельская гаспадарка краіны не ў стане вырошчваць столькі бульбы, каб яе экспартаваць. Таксама ўмовы захоўвання, вядома, вельмі кепскія. Да траўня практычна скончыліся старыя запасы бульбы, а новай няма.
Вось адсюль узнік дэфіцыт. І гэта таксама гаворыць пра крах лукашэнкаўскай мадэлі эканомікі. Сёння ёсць сур'ёзныя праблемы і ў сувязі з уведзенымі санкцыямі, і ў сувязі з тым, як Лукашэнка кіруе краінай.
Гэта катастрофа. І вось сёння беларусы, канешне, вельмі сур'ёзна адчуваюць, да чаго прыводзіць жыццё пры дыктатуры, ды яшчэ і ва ўмовах вайны.
Вялізная колькасць беларусаў з'ехала з краіны пасля 2020 года. Амаль 600 тысяч чалавек - гэта самыя таленавітыя, самыя адукаваныя людзі і запатрабаваныя на рынку працы. IT-фірмы і міжнародныя кампаніі выязджалі цэлымі офісамі, забіраючы тысячы сваіх супрацоўнікаў. Таму, вядома, зараз сітуацыя ў краіне вельмі цяжкая. Заробкі нізкія, кошты высокія, прадуктаў не стае. Але калі ўжо знікла бульба - гэта гаворыць аб поўным фіяска Лукашэнкі.
Адзін з падпісантаў YouTube-канала Яўгенія Кісялёва задаў пытанне аб знікненні спікеркі «каардынацыйнай рады» Анжалікі Мельнікавай. Наталля Радзіна расказала, што вядома на гэты момант:
- Я крытыкавала офіс Ціханоўскай і структуры, якія былі створаныя ў Беларусі пасля таго, як яна выехала з краіны. І Анжаліка Мельнікава - гэта акурат кіраўніца адной з такіх бутафорскіх арганізацый, якія былі створаныя ў Польшчы і Літве.
Гэтая так званая каардынацыйная рада — абсалютна нелегітымная і фэйкавая структура. У інтэрнэт-галасаванні за яе ўзялі ўдзел усяго 6800 грамадзян Беларусі з 7 мільёнаў беларускіх выбарцаў. Абсалютна мізэрная колькасць людзей. Гэта было названа Ціханоўскай і яе паслугачамі «протапарламентам». У выніку Анжаліка Мельнікава, якая ніколі не мела дачынення да апазіцыі, стала кіраўніцай гэтай так званай каардынацыйнай рады.
З'явілася Мельнікава з ніадкуль. Яе мінулае месца працы — мэнэджарка ў кампаніі «Coca-Cola Беларусь». Імігравала яна пасля 2020 года з нейкай легендай аб тым, што яе нібыта затрымлівалі на дэманстрацыях, але адпускалі. Парэкамендаваў Мельнікаву ў «каардынацыйную раду» Павел Латушка — гэта яшчэ адзін персанаж, да якога ў мяне вельмі шмат пытанняў. Былы міністр і амбасадар за Лукашэнкам, які 23 гады працаваў на дыктатуру і пасля 2020 года выехаў на Захад да Ціханоўскай, каб, так бы мовіць, «узначаліць апазіцыю».
Анжаліка Мельнікава знікла ў лютым гэтага года. Высветлілася, што разам з ёю зніклі заходнія гранты, выдзеленыя «каардынацыйнай радзе». У выніку расследавання, якое праводзяць і польскія журналісты (бо яна пражывала на тэрыторыі Польшчы), і расейскія журналісты з выдання The Insider, высветлілася, што ў яе былі сувязі з беларускімі спецслужбамі. Найбольш імаверна, што яна была альбо першапачаткова агенткай беларускіх спецслужбаў, альбо была завербаваная імі пазней.
Цяпер чакаецца, што Мельнікава можа з'явіцца на экранах беларускіх прапагандысцкіх каналаў з некаторымі адкрыццямі і аповедамі. Гэта, увогуле, не першы скандал у структурах, створаных Ціханоўскай. Вакол яе вельмі шмат дзіўных людзей. Усе гэтыя гады побач з ёй знаходзяцца былыя чыноўнікі і сілавікі рэжыму Лукашэнкі. Упэўненая, што там, вядома, інфільтрацыя спецслужбамі проста татальная. З гэтых псэўдаструктур была вялізная колькасць выцекаў інфармацыі, якія прыводзілі да масавых арыштаў грамадзян на тэрыторыі Беларусі. Вельмі шмат скандалаў. Так што гісторыя з Мельнікавай не здзіўляе.
Наталля Радзіна прызывае не ўжываць слова «апазіцыя» ў дачыненні да асяроддзя Ціханоўскай. Бо сапраўдныя лідары беларускага супраціву знаходзяцца ў турмах:
- Гэтыя людзі не маюць права прадстаўляць беларускую апазіцыю, яны не змагаліся з рэжымам Лукашэнкі гадамі, як гэта рабілі вельмі многія годныя прадстаўнікі беларускай апазіцыі, якія сёння альбо знаходзяцца ў турмах, альбо ў вымушанай эміграцыі. Аб'явіўшыся толькі ў 2020 годзе яны адразу выехалі ў заходнія краіны і селі на плыні еўрапейскіх грошай.
І я перакананая, што рэальная беларуская апазіцыя, рэальныя лідары беларускай апазіцыі сёння знаходзяцца ў турмах.
Яўген Кісялёў спытаў Наталлю Радзіну, ці баіцца Лукашэнка магчымага адказу на вучэнні «Захад-2025» з боку ўкраінцаў і еўрапейцаў. Галоўная рэдактарка сайта Charter97.org мяркуе, што дыктатар не можа супрацьстаяць ціску з боку Расеі:
- Лукашэнка, безумоўна, разумее, чым небяспечная эскалацыя вайны з боку Расеі супраць Украіны ці краін Балтыі з выкарыстаннем тэрыторыі Беларусі.
Думаю, ён гэтага баіцца, бо ўкраінскія эксперты проста заяўляюць, што калі расейскія войскі — самастойна або разам з беларускімі — рушаць у бок Украіны, у адказ будуць наносіцца ракетныя ўдары па вайсковых аб'ектах і збоі расейскіх войск, а таксама яны гавораць аб ударах па буйных беларускіх прадпрыемствах, уключаючы беларускія нафтаперапрацоўчыя заводы, якія сёння вырабляюць дызельнае паліва для расейскай вайсковай тэхнікі.
Канешне, Лукашэнка разумее ўсе пагрозы, але зрабіць нічога не зможа.
У канцы размовы Яўген Кісялёў зачытаў каментар аднаго з гледачоў эфіру:
«Я ведаю, што большасць беларусаў душой і сэрцам з намі, украінцамі. Вайна пройдзе, Лукашэнка пойдзе, мы павінны быць братамі і павінны быць разам».
- Дзякуй за салідарнасць з беларусамі, бо наш народ сапраўды з украінцамі. Слава Украіне! Жыве Беларусь! - Скончыла інтэрв'ю Наталля Радзіна.