Лідараў, якія збіраліся на парад у Маскву, косіць «немач»
- 3.05.2025, 17:32
«Парадны вірус» – штука сур'ёзная, але Лукашэнку не даступная.
Сербскі прэзідэнт Вучыч і славацкі прэм'ер Фіцо, якія клятвенна абяцалі Пуціну быць 9 траўня ў Крамлі, «нечакана» адчулі праблемы са здароўем.
Так, паведамляецца, што прэзідэнт Сербіі Аляксандр Вучыч праз нядужанне перапыніў свой візіт у ЗША і на рэкамендацыю лекараў датэрмінова вяртаецца ў Бялград. Удзел Вучыча ў парадзе 9 траўня ў Маскве, ад якога яго адгаворвалі еўрапейскія палітыкі, цяпер знаходзіцца пад пытаннем, адзначае «Салідарнасць».
Хвароба падкасіла і прэм'ер-міністра Славакіі Роберта Фіца, які таксама збіраўся ў Маскву. Ён «захварэў» яшчэ напярэдадні «першамайскіх» урачыстасцяў у Славакіі. Былы прэзідэнт Чэхіі Мілаш Земан патлумачыў, што прычынай раптоўнай змены планаў сталі наступствы леташняй траўмы.
На «раптоўную» хваробу лідараў звярнулі ўвагу нават крамлёўскія прапагандысты.
Каго наступнага скосіць «парадны вірус», застаецца толькі варажыць.
– Пасля праблемаў са здароўем, якія на фоне хваробы Аляксандра Вучыча цяпер узніклі і ў «славацкага арыгінала» Роберта Фіцо, коткі на душы скрабуць наконт Віктара Орбана, – іранізуе палітычны аглядальнік Аляксандр Фрыдман. – Горш за ўсё, аднак, Лукашэнку. Перашкодзіць яму прыехаць у Маскву на 9 траўня ў цяперашняй сітуацыі можа, мабыць, толькі ўварванне іншапланетнікаў у Магілёўскую вобласць.
Зрэшты, ёсць сумневы, што ў цяперашніх абставінах нават высадка ў Беларусі НЛА зможа перашкодзіць Лукашэнку выправіцца да Пуціна. Ён і сам пацвердзіў неўнікнёнасць візіту. Сустракаючыся з Пуціным 29 красавіка ў Валгаградзе, беларускі кіраўнік так і заявіў, што «не можа не наведаць» парад 9 траўня ў Маскве.
– Вы ведаеце, што мы едзем спачатку на Красную плошчу, потым праводзім парад у сябе ў Беларусі, – сказаў ён на сустрэчы з Пуціным, – перадае ягоныя словы прэс-служба Крамля.
Характэрна, што да 2020 года кіраўнік Беларусі мог спакойна адмовіцца ад такога гонару. «Заняты дома» – так ён тлумачыў сваю адсутнасць у 2015 годзе, спасылаючыся на тое, што, будучы галоўным камандзірам, павінен прымаць парад у Менску.
А ў 2019-м і ўвогуле заявіў, што яго не клікалі.
– Па-першае, мяне ніхто не запрашаў сёння ў Маскву, па-другое, нават калі б запрасілі, было б складана развесці гэтыя мерапрыемствы (парады ў Менску і на Краснай плошчы – заўв. С), – тлумачыў тады беларускі кіраўнік.
Але здарыўся 2020 год – і мерапрыемствы ў Крамлі і Менску сталі цалкам добра сумяшчацца ў графіку Лукашэнкі. Прычым у любым стане кіраўніка.
Многім памятаецца ягоны нездаровы выгляд падчас параду ў 2023 годзе. Лукашэнка выглядаў выматаным, не змог прайсці 300 метраў па Краснай плошчы (скарыстаўся электракарам), а на ягонай сіняй руцэ відаць быў бінт – такія ставяць пасля кропельніцы.
Летась кіраўнік выглядаў лепей, хоць і тады не выпраменьваў святочнага настрою.
Цяперашні парад у Крамлі таксама стане для яго своеасаблівым выпрабаваннем. Асабліва пасля «стужкавай» эпапеі (дарэчы, цікава паглядзець, што прышпіліць Лукашэнку да сваёй пятліцы).
У цяперашніх абставінах «парадны вірус» для некаторых раскоша недазваляльная.