Беларусам прыходзяць падробленыя галасавыя паведамленні ад іх знаёмых

• 4.05.2025, 21:10

Ашуканцы асвоілі новую схему.

Міліцыя патлумачыла беларусам, як адрозніць адноўлены штучным інтэлектам голас знаёмых людзей. Пра гэта ў інтэрв'ю дзяржСМІ сказаў намеснік начальніка ўпраўлення па супрацьдзеянні кіберзлачыннасці ГУУС Мінгарвыканкама Дзмітрый Шавялёў.

- Што тычыцца прайгранага нейрасеткай голасу, інтанацыю жывога чалавека ён не паўтарае. Таму пакуль нескладана вызначыць, што ён згенераваны ІІ, - падкрэсліў спецыяліст.

Разам з тым у Менску ўсё ж сустракаюцца выпадкі, калі кіберзлачынцы падрабляюць галасы, карыстаючыся інструментарыем штучнага інтэлекту. Напрыклад, Шавялёў расказаў, як быў узламаны тэлефон 20-гадовага жыхара сталіцы, а ад яго імя кантакты маладога чалавека атрымалі згенераванае нейрасеткай галасавое паведамленне. Там утрымлівалася просьба пазычыць 450 рублёў. Праўда, грошы ашуканцам ніхто не пералічыў.

Дзмітрый Шавялёў дадаў, кажучы аб падробцы аферыстамі галасоў з дапамогай ШІ:

- Такіх выпадкаў у Менску зарэгістравана няшмат, і часцей за ўсё ніхто грошы не пералічвае, бо ашуканцы проста масава рассылаюць паведамленне. І зразумела, што з кожным з кантактаў у чалавека розныя ўзаемаадносіны. Таму тут пацярпелых практычна няма.