Стала вядома, хто прапанаваў Трампу ідэю ўвесці мыту на замежныя фільмы

• 6.05.2025, 11:42

За прапановай стаіць вядомы актор.

Амерыканскі актор Джон Войт пацвердзіў: менавіта ён прапанаваў прэзідэнту ЗША Дональду Трампу ўвесці тарыфы на фільмы, знятыя за межамі ЗША. Цяпер Трамп збіраецца абкласці іх 100-адсоткавай мытай. Мэта - вярнуць кінавытворчасць на радзіму і "выратаваць Галівуд", піша часопіс Rolling Stone (пераклад-сайт Charter97.org).

"Наш прэзідэнт, Дональд Дж. Трамп, любіць індустрыю забаў і хоча бачыць, як Галівуд зноў квітнее, будзе здымаць больш і лепш, чым калі-небудзь”, — заявіў Войт у відэазвароце пад назвай “План выратавання Галівуда”, апублікаваны ў сацсетцы X.

Актор, чыя кар'ера пачалася ў залатую эпоху амерыканскага кіно, не хавае настальгіі: "Галівуд, у які я закахаўся дзіцем... ён знікае. Людзі страчваюць дамы. Не могуць карміць сем'і".

Войт распавёў, што яго прапановы ўключаюць падатковыя льготы, змены ў Падатковым кодэксе, субсідыі на інфраструктуру і падтрыманне кінатэатраў як найважнейшага элемента “амерыканскага сямейнага досведу”. У прэс-рэлізе, які распаўсюдзілі прадстаўнікі Войта і яго партнёра Стывена Пола, мыты згаданыя мімаходзь – “у абмежаваных выпадках”.

Але Трамп не стаў сціпла паводзіцца: "замежныя краіны завабліваюць нашых рэжысёраў і студыі. Гэта скаардынаваная атака, пагроза нацыянальнай бяспецы! Акрамя ўсяго іншага — гэта яшчэ і прапаганда!"- напісаў ён на Truth Social.

Цяпер Галівуд стаіць перад выбарам: застацца "амерыканскім" або добра заплаціць за кінамару.