Менскі блогер заўважыў у краме дзіўную колу ад «Дарыды»

• 6.05.2025, 15:15

Раней такую прадавалі толькі ў Расеі.

Папулярны Менскі блогер «Мерзкий Кокобай» «выклаў фотарафію з крамы, дзе адна на другой стаяць упакоўкі колы ад «Дарыды». Ён падпісаў фатаграфію словамі «навінкі пад'ехалі на тэст!», заўважыў сайт Blizko.by.

Што ў гэтым дзіўнага? Мабыць, тое, што такой колы пакуль яшчэ няма ў каталогу кампаніі. «Дарыда» выпускала колу ў лінейцы Zeronad, выява напою ёсць у англамоўнай версіі сайта (а ў рускамоўнай няма). У лінейцы звычайных газаваных напояў такой колы на сайце кампаніі няма.

Цікава, што такая кола ад «Дарыды», з чырвона-сіняй этыкеткай, раней прадавалася ў Расеі, на сайтах крам накшталт «беларускія прадукты» можна знайсці згадкі і цэннік на 152 расейскія рублі.

«Дарыда» раней выпускала напой «Бел-кола», і саступіла ў судзе Менскаму заводу безалкагольных напояў: суд палічыў, што «Бел-кола» ў ступені змешвання нагадвае «Бела-колу», якая выпускаецца з 1998 года.