Украіна і Расея правялі вялікі абмен палоннымі

• 6.05.2025, 16:40

З палону вызвалілі 205 украінцаў.

Украіна і Расея правялі вялікі абмен палоннымі ў аўторак, 6 траўня. З расейскага палону вызвалілі 205 украінцаў, паведаміў у Telegram прэзідэнт Украіны Уладзімір Зяленскі.

З яго слоў, сёння Украіна вярнула 205 воінаў. Яны былі раскіданыя па многіх расейскіх рэгіёнах.

- Мы вярнулі іх. І я дзякую ўсім, хто працаваў над гэтым абменам. Дзякуй партнёрам, перш за ўсё Аб'яднаным Арабскім Эміратам, за пасярэдніцтва і дапамогу. Дзякуй тым, хто неабыякавы і працягвае казаць аб украінцах у палоне, - напісаў Зяленскі.

Паводле звестак упаўнаважанага Вярхоўнай Рады ў правах чалавека Дзмітрыя Лубінца, сёння адбыўся 64-ы абмен палоннымі паміж Украінай і Расеяй. Усяго з пачатку поўнамаштабнага ўварвання ва Украіну ўдалося вярнуць ужо 4757 украінцаў.

- Многія абаронцы знаходзіліся ў палоне з пачатку поўнамаштабнага ўварвання, ёсць вернутыя цяжкахворыя і параненыя, - паведаміў Лубінец.

Паводле інфармацыі ГУВ МА Украіны, на гэты раз сярод вызваленых воінаў - прадстаўнікі Узброеных Сіл Украіны, прынамсі, Вайскова-марскіх сіл, Паветраных сіл, Дэсантна-штурмавых войск, Сіл ТрА, а таксама Нацыянальнай гвардыі Украіны і Дзяржаўнай пагранічнай службы Украіны.

Дадому вяртаюцца тры ўкраінскія афіцэры і 202 жаўнеры і сяржанты.

Вызваленыя Абаронцы абаранялі Украіну на Данецкім і Луганскім кірунках, у Запарожжы і Харкаўскай вобласці, у Херсонскай, Сумскай і Кіеўскай абласцях, а таксама Абаронцы з гарнізона Марыупаля.