Беларусам, прызнаным «дармаедамі», сталі прыходзіць дзіўныя лісты

• 6.05.2025, 17:06

Яны падобныя да позваў.

«Незанятым у эканоміцы» жыхарам Гомельскай вобласці сталі прыходзіць лісты з міліцыі, пра гэта піша «Флагшток».

Як адзначаецца, лісты з міліцыі больш падобныя да позваў. У адным з «апавяшчэнняў аб прыходзе», перададзеным журналістам, пазначана ва ўльтыматыўным тоне, што атрымальніку неабходна з'явіцца ў мясцовы РАУС «для разгляду пытання працаўладкавання».

Раней «дармаедам» такія лісты не прыходзілі, яны атрымлівалі толькі паведамленні з прапановай дапамогі ў працаўладкаванні.

Вядома, што апавяшчэнні ад міліцыі атрымалі і людзі, якія ўжо пяць і больш гадоў працуюць за мяжой і не жывуць у Беларусі.

У апавяшчэнні сказана, што міліцыя рассылае лісты ў мэтах «забеспячэння захавання канстытуцыйнага абавязку грамадзян аб удзеле ў фінансаванні дзяржаўных выдаткаў шляхам выплаты падаткаў». Аднак у Канстытуцыі Беларусі аб гэтым нічога не напісана. Існуе права на працу, але не абавязак.

Раней паведамлялася, што ў Гомельскай вобласці сталі праводзіць прымусовыя «кірмашы вакансій» на базе аддзелаў міліцыі.