Палац Радзівілаў узляцеў у цане ў тры тысячы разоў

• 8.05.2025, 14:37

Яго прадаюць з малатка.

Палац Радзівілаў у Дзятлаве выставілі на электронныя таргі на пляцоўцы «БУТБ-маёмасць», паведамілі ў прэс-службе біржы. Райвыканкам прапануе купіць яго за 296 тысяч рублёў (каля 90 тысяч даляраў) з закладам 30 тысяч рублёў, якія трэба выплаціць перад аўкцыёнам.

Помнік архітэктуры стаяў пустым шэсць гадоў, перш чым яго змаглі прадаць. Спачатку ў 2021 годзе будынак спрабавалі прадаць за 145 тысяч рублёў, у траўні і жніўні наступнага года — ужо за 31 тысячу рублёў, паменшыўшы першапачатковую цану на 80%. Але ахвочых не знайшлося.

Толькі калі на чарговым аўкцыёне, які прайшоў у лістападзе 2022 года, кошт за ўвесь будынак знізілі да 3 базавых адзінак, або 96 рублёў, з'явіўся адзіны пакупнік — расейскі бізнэсовец, які ўрэшце і стаў уладальнікам Палаца Радзівілаў.

Яго прадстаўніца казала, што гаворкі пра камерцыялізацыю аб'екта не ідзе і што палац будзе мець толькі сацыяльную накіраванасць — магчыма, у ім з'явіцца рэабілітацыйны цэнтр або іншую ўстанову для дапамогі людзям.