Біл Гейтс абвінаваціў «найбагацейшага ў свеце» Маска ў забойстве самых бедных дзяцей

• 8.05.2025, 18:55

Сузаснавальнік карпарацыі Microsoft раскрытыкаваў закрыццё праграм USAID.

Сузаснавальнік карпарацыі Microsoft і філантроп Біл Гейтс абвінаваціў Ілана Маска ў «забойстве самых бедных дзяцей свету» праз закрыццё праграм Агенцтва ЗША ў міжнародным развіцці (USAID). Аб гэтым ён заявіў у інтэрв'ю Financial Times.

Праз значнае скарачэнне фінансавання ЗША жыццёва важныя прадукты харчавання і лекі сапсаваліся на складах, а свет можа сутыкнуцца са ўспышкамі такіх захворванняў, як адзёр, ВІЧ і поліяміэліт, упэўнены Гейтс. «Калі найбагацейшы чалавек у свеце забівае самых бедных дзяцей у свеце, гэта выглядае не вельмі добра», - сказаў ён.

Дарэчы, Гейтс згадаў лякарню ў правінцыі Газа ў Мазамбіку, якая займаецца прафілактыкай перадачы ВІЧ ад маці дзіцяці, але пазбавілася грантаў: улады ЗША памылкова падумалі, што арганізацыя пастаўляе прэзерватывы для ХАМАС у сектары Газа. «Я хацеў бы, каб ён сустрэўся з дзецьмі, якія цяпер інфікаваныя ВІЧ, бо ён урэзаў гэта фінансаванне», — сказаў мільярдэр.

Са слоў Гейтса, Маск, які назваў USAID «злачыннай арганізацыяй», не разумее, чым займаецца агенцтва і як яно працуе. У лютым Маск прызнаў, што памылкова прыняў мазамбіцкую правінцыю Газа за палестынскую тэрыторыю.