Суперкампутар назваў фаварыта на перамогу ў Лізе чэмпіёнаў

• 8.05.2025, 20:08

«Інтэр» ці «ПСЖ»?

Суперкампутар аналітычнай кампаніі Opta назваў «Пары Сэн-Жэрмэн» галоўным прэтэндэнтам на перамогу ў Лізе чэмпіёнаў сезону 2024/25.

Згодна з прагнозам Opta, верагоднасць перамогі французскага клуба ацэньваецца на 53,6 адсотка. Шанец італьянцаў атрымаць перамогу складае 46,4 адсотка.

«Інтэр» 6 траўня ў паўфінале перамог «Барселону» (7:6 паводле двух матчаў) і выйшаў у фінал турніру. ПСЖ на наступны дзень падолеў лонданскі «Арсенал» і паводле дзвюх сустрэчаў выйшаў у вызначальны матч (3:1 паводле двух матчаў).

Дзейным пераможцам Лігі чэмпіёнаў з'яўляецца мадрыдскі «Рэал», які ў фінале мінулай разгулянкі перамог дортмундскую «Барусію» з лікам 2:0. «Рэал» таксама з'яўляецца рэкардсмэнам у колькасці перамог у гэтым турніры – клуб перамагаў у Лізе чэмпіёнаў 15 разоў.

Фінал Лігі чэмпіёнаў адбудзецца 31 траўня ў Мюнхене на стадыёне «Альянц Арэна».