Сусветныя лідары павіншавалі новага Папу Рымскага з выбраннем

• 8.05.2025, 21:22

Роберт Прэво стаў 267-м Папам.

Сусветныя лідары і дыпламаты павіншавалі амерыканскага кардынала Роберта Прэво (Льва XIV) з абраннем на пасаду 267-га Папы Рымскага.

«Шчыра віншую Папу Рымскага Льва XIV з абраннем на пасад святога Пятра і пачаткам пантыфікату», – напісаў прэзідэнт Украіны Уладзімір Зяленскі.

Ён адзначыў, што Украіна высока цэніць паслядоўную пазіцыю Апостальскай Сталіцы ў выкананні міжнароднага права, асуджэнні ваеннай агрэсіі РФ супраць Украіны і абароне правоў невінаватых цывільных грамадзянаў.

«У гэты вызначальны для нашай краіны момант спадзяемся на далейшую маральную і духоўную падтрымку з боку Ватыкана намаганняў Украіны, накіраваных на аднаўленне справядлівасці і дасягненне доўгага міру», – дадаў Зяленскі.

Міністр замежных справаў Чэхіі Ян Ліпоўскі заявіў, што абранне Прэво ў дзень, «калі мы адзначаем 80 гадоў з дня заканчэння адной з самых цёмных войнаў, з'яўляецца сімвалічным і ўяўляе з сябе надзею для ўсяго свету».

Прэзідэнт ЗША Дональд Трамп напісаў: «Гэта такі гонар усведамляць, што ён першы амерыканскі Папа. Якое хваляванне і які вялікі гонар для нашай краіны. Я з нецярпеннем чакаю сустрэчы з Папам Львом XIV. Гэта будзе вельмі значны момант».

Да віншаванняў таксама далучылася прэзідэнтка Еўракамісіі Уршуля фон дэр Ляен: «Зычым, каб ягоны пантыфікат кіраваўся мудрасцю і сілай, паколькі ён узначальвае каталіцкую супольнасць і натхняе свет сваёй прыхільнасцю да міру і дыялогу».

Прэзідэнт Францыі Эмануэль Макрон: «Гістарычны момант для Каталіцкай царквы і мільёнаў яе вернікаў. Звяртаюся з брацкім пасланнем да Папы Льва XIV і да ўсіх католікаў у Францыі і ва ўсім свеце. У гэты дзень 8 траўня няхай новы пантыфікат будзе носьбітам міру і надзеі».