Марка Рубіё правёў перамовы з прэм'ер-міністрам Пакістана

• 9.05.2025, 10:27

Размова адбылася на фоне абвастрэння канфлікту з Індыяй.

Вашынгтон, 8 траўня 2025 года — дзяржсакратар ЗША Марка Рубіё правёў сёння перамовы з прэм'ер-міністрам Ісламскай Рэспублікі Пакістан Мухамадам Шахбазам Шарыфам, гаворыцца ў прэс-рэлізе Дзяржаўнага дэпартамента ЗША (пераклад — сайт Charter97.org).

Падчас размовы дзяржсакратар падкрэсліў неабходнасць неадкладнай дээскалацыі напружанасці ў рэгіёне і выказаў падтрымку прамога дыялогу паміж Індыяй і Пакістанам.

Рубіё адзначыў важнасць падтрымання каналаў сувязі і заахвоціў далейшыя намаганні старон у наладжванні канструктыўнага ўзаемадзеяння. Ён таксама выказаў глыбокія спачуванні ў сувязі з паведамленнямі аб ахвярах сярод мірнага насельніцтва ў выніку бягучага канфлікту.

Дзяржсакратар асабліва адзначыў, што ЗША чакаюць ад Пакістана канкрэтных і дзейсных крокаў па спыненні любой падтрымкі экстрэмісцкіх і тэрарыстычных груповак.